జీవించాలంటే.....

~~ జీవించాలంటే.....~~ జీవితాలకేం ప్రయాణిస్తూనే ఉంటాయ్ ఒక్కోసారి సెకెన్ల ముల్లులా పరుగులుతీస్తాయ్ మరోసారి నిమిషాలముల్లుతో పాటు ఆచితూచి అడుగులు వేస్తూ గంటలముల్లుతో బధ్ధకంగా సోమరిగా కదులుతూ కాలంతో పాటూ నడుస్తూనే ఉంటాయి. ఈ మనసే పరమదుర్మార్గపుది జ్ణాపకాలపుట్టని నిరంతరమూ తవ్వుతూ జీవితం ముంగిట్లో ఆశలచెట్టు మొదల్నే సారవంతం చేస్తున్నానంటుంది కానీ కాసిని చిరునవ్వు పువ్వుల్ని ఎప్పుడో గానీ పెదాలమీద అలంకరించదు జీవితంతో చేయి చేయి కలిపి ఈ మనసు నడవకుండా నడక దారంతా ముళ్ళు రాలుస్తూ సాల్వడార్ కరిగిపోతున్న కాలం గురించి కథలు కథలు గా చెప్పి నిరుత్సాహపు పొరల్ని కళ్ళ మీద పరిచి చెలమల్ని అద్దుతుంది ఎప్పుడో ఒకప్పుడు సమయం చూసి ఈ దుర్మార్గపు మనసుని ఒడుపుగా బంధించాలి ఆలోచనల్ని ఎగిరిపోనీయకుండా పిడికిట పట్టి మనసులో ఒంపి పెంపుడు పిల్లిని చేసి మనవెనకే తిప్పుతూ పక్కదార్లు పట్టనీకుండాచేయాలి ఇక ఆ తర్వాత జీవితంతో చేతులు కలిపి నడవాల్సిందే తప్పదు గాక తప్పదు. (ప్రజాశక్తి సాహిత్య పేజీ 3/7/23)