baalyamlOki

     బాల్యంలోకి


రెక్కల గుర్రం ఎక్కి విశ్వమంతా తిరిగి
మబ్బుపింజల్ని ఏరుకొచ్చి పరుపేసుకోవడం-
ఆకాశమంతా చుట్టి
చుక్కల్ని కోసుకొచ్చి ఇల్లంతా వెలుగు నింపుకోవడం
కౄరమృగాల్ని సైతం చిటికలో లొంగదీసుకుని
వీధిగుమ్మంలో కాపలా పెట్టుకోవడం-
చెట్లకున్న రూపాయి ఆకుల్ని తెంచి తోరణాలు కట్టడం-
కాయల్లో మెరిసే ముత్యాల్ని ఒలుచుకొని మాలల్ని కట్టడం-
కలల్లో కబుర్లే కావచ్చు
తలచుకొన్నప్పుడు గిలిగింతలు పెట్టక తప్పవు
ఏడేడు సముద్రాల్ని  దాటి
మర్రిచెట్టు తొర్రలోని చిలకలో దాగిన రాక్షసుడి ప్రాణం తీసి
రాకుమార్తెను చేపట్టె వీరుని సాహసాలు
పాతాళభైరవి కోసం మాంత్రికుడి పాట్లు
మాయాబజారు ఘటోత్కచుని మాయలు
అవాస్తవికాలే కావచ్చు
నిజజీవితంలో సమస్యల్ని కాసేపు మడతపెట్టి
చూస్తున్నంతసేపూ తనివితీరా కేరింతలు కొట్టడం కోసమైనా
ఒక్కసారి మన శరీరాల్ని విప్పేసుకొని
బాల్యం తొడుగులోకి దూరాలనిపించడం తప్పేం కాదు
  (24-4-1 996)