లోపలి మనిషి చిరునామా కోసం ~
నాతో మాట్లాడాలనుకుంటే
నేల చూపులు చూడకు
నాకళ్ళలోకీ
కంటిపాప లోతుల్లో ప్రవహించే
సజల సముద్రాల్ని చూడు
అక్కడ నీకోసమో నాకోసమో కాక
చుట్టూ ఉండే వారికోసం
తడి ఆరని చెమ్మని హత్తుకో
నాతో మాట్లాడాలనుకుంటే
నా హృదయం నిరంతరంగా
శబ్దించే సానుకూల స్పందనల్ని విను
అంతకన్నా ముందు
హృదయభాషని అధ్యయనంచేయు
అప్పుడే
నీ ఆవరణలోని జనఘోషని
నీలోకి అనువదించుకోగలుగుతావు.
నాతో మాట్లాడాలనుకుంటే
నామెదడులోకి ప్రవేశించు
అక్కడినుండి మెదడు పొరలమధ్య
అల్లిబిల్లిగా అల్లుకున్న ఆలోచనల తీగల్ని మీటు
ఎందరెందరో స్త్రీల అస్తిత్వ రాగాల్ని
వెతుక్కుంటూ ప్రయాణించు
ఎక్కడో ఒక దగ్గర నీవాళ్ళు కూడా కనిపించొచ్చు.
నాతో మాట్లాడాలనుకుంటే
నేను పరిచిన కాగితం మీద చూపు సారించు
పంక్తులదారంట అక్షరాలను ఏరుకుంటూ
ముందుగా నీలోకి ఇంకించుకో
నీ అభిప్రాయాలు నువ్వు సంతరించుకో
సషబిషలు లేకుండా
నువ్వేమనుకుంటున్నావో
రెండు నాలికలతో కాకుండా
నిజాయితీగా నీమాటలు గానే చెప్పు
మంచైనా చెడైనా అరువు మాటలు కాక
మనసు విప్పి మాట్లాడు.
పోనీలే అలా కాదనుకుంటావా
నీలోని నువ్వును వెతుక్కుంటూ
నీలోకి నువ్వే ప్రవహించి
మౌనలిపిని హృదయంపై చెక్కుకుంటూ
నీతో నువ్వే సంభాషించుకో
అప్పుడైనా
నీ లోపలి మనిషి నీకు చిక్కుతాడేమో.
(కవిసంధ్య మే- జూన్2022)
కామెంట్లు లేవు:
కామెంట్ను పోస్ట్ చేయండి